Inuit Pisinnaatitaaffii
Kikkut tamarmik kiffaanngissuseqarlutik naligiillutillu inuunissaat sulissutigaarput. Inuit pisinnaatitaaffii isumaqatigiissutini assigiinngitsuni illersugaapput. Uani inuit pisinnaatitaaffii pillugit isumaqatigiissutit saqqummersitallu atuakkit.
Inuttut pisinnaatitaaffiit inaarneqavissimasumik imaqanngillat. Inuttut pisinnaatitaffiit ataavartumik ineriartortuartuupput. Inuttut pisinnaatitaaffiit inunnit pilersinneqarsimasuupput, pisinnaatitaaffiit pillugit assigiingitsunik isumaqarsimasinnaasunik. Inuiaqatigiinnut pingaaruteqartumik apeqqutaasoq tassa, pisinnaatitaaffinnik sorlernik inuit peqarnersut, aamma inuit ataasiakkaat pisinnaatitaaffi qanoq illersorneqarnersut. Inuit sumik pisinnaatitaaffeqarnerinut apeqqutit Danmarkimi politikkerinit aalajangersarneqartarput. Danmarkip toqqarsimavaa inuit pisinnaatitaaffiinik illersuinissamut nunarsuarmioqatigiinnik isumaqatigiissusiortarniarluni (isumaqatigiissutit/atsioqatigiilluni aalajangersakkat).
Isumaqatigiissutit Naalakkersuisuinit isumaqatigiissutigineqartarput Folketingimillu akuersissutigineqartarlutik, inatsit tunngaviusoq malillugu isumaqatigiissutit pilersinniarneranni Folketingi peqataasussaammat. Naalakkersuisut aamma Folketingini inuttut piginnaatitaaffiit pillugit nunarsuarmioqatigiinnik isumaqatigiissuteqarsinnaatitaallutillu isumaqatigiissutinik atorunnaarsitsisinnaatitaapput. Taamaaliorsinnaatitaanngillalli apeqqutini pissutsinilu, nunarsuarmioqatigiinnik isumaqatigiissusiorsinnaanini Danmarkip allanut tunniussimappagu, imaluunniit inatsisip tunngaviusup qinikkat pisinnaatitaaffii killilersimappatigit.
Savalimmiut aamma Kalaallit Nunaat kunngeqarfiup Danmarkip ilagai. Inatsit tunngaviusoq malillugu (§19) Naalakkersuisut oqartussaaffigaat inuit pisinnaatitaaffiinut pisussaaffiliisumik isumaqatigiissuteqarnissaq (isumaqatigiissusiorsinnaanermut oqartussaaffik) aamma nunanut allannut tunngasunik politikkimik ingerlatsineq akisussaaffigalugu.Susassaqarfitsigut immikkut ersarissumik killilerneqarsimasutigut Kalaallit Nunaat aamma Savalimmiut pisinnaatsitsissummik inatsit aqqutigalugu inuttut pisinnaatitaaffitsigut isumaqatigiissuteqarsinnaapput. Aaqqissuussinermut tassunga ilaanngillat isumaqatigiissutit Danmarkimut atuuttussat, imaluunniit inuttaasut akornanni kattuffiit aqqutigalugit isumaqatigiinniutigineqartussat, taakkunani Danmark ilaasortaappat. Inunnut pisinnaatitaaffinnut tunngasut isumaqatigiissutini ersarissumik ilaatinneqanngillat.