Inuit Pisinnaatitaaffii pillugit Siunnersuisoqatigiinni ilaasortat
Nunatsinni Inuit Pisinnaatitaaffii pillugit Siunnersuisoqatigiit (IPS) 2013-imi Naalagaaffiit Peqatigiit Parisimi toqqammavissiaat, nuna tamakkerlugu inuit pisinnaatitaaffii pillugit sullissivinnik pilersitsinissamut tunngassuteqartut tunngavigalugit pilersinneqarput. Nuna tamakkerlugu inuit pisinnaatitaaffii pillugit instituttimik (NHRI) taaneqassagaanni Parismi toqqammavissiat eqquutsinneqartariaqarput.
Inatsisartut inatsisaat Parisimi toqqammavissianik aallaaveqartoq tunngavigalugu IPS pilersinneqarpoq.
Soqutigisat suut Siunnersuisoqatigiinni ilaasortanit sinniisuuffigineqarnissaat, suliassallu suut Siunnersuisoqatigiinnit isumagineqarnissaat, Inatsisartuniik inatsimmi ilaatigut nassuiarneqarput.
Siunnersuisoqatigiit inatsisaat pisinnaatitaanerallu uani paasisaqarfigineruk:
Siunnersuisoqatigiit katitersornera
Siunnersuisoqatigiit aalajangersimasunik sisamanik inatsisartuniillu toqqakkanik qulinik ilaasortaqarput. Ilaasortat amerlanerit tassaapput illersuisoqarfinnit MIO-mit, Tiliumillu sinniisut, Utoqqaat illersuisuat Naligiissitaanermullu Siunnersuisoqatigiinni siulittaasoq.
Ilaasortat sinneri qulit, ukiuni sisamani atuuffeqartussatut toqqagaasarput, makkulu arlaanniit ilisimasatik tunngavigalugit innersuunneqartarlutik:
- Meeqqanut inuusuttunullu tunngatillugu suliniaqatigiiffinnut, pisortanut attuumassuteqanngitsunut sinniisoq
- Inunnut innarluutilinnut tunngatillugu suliniaqatigiiffinnut, pisortanut attuumassuteqanngitsunut sinniisoq
- Eqqartuussiveqarnermut inatsisitigullu illersugaanermut tunngasunut sinniisoq
- Ilinniartitaanermut ilisimatusarnermullu tunngasunut sinniisoq
- Nunap inoqqaavisa pisinnaatitaaffiinut tunngatillugu suliniaqatigiiffinnut, pisortanut attuumassuteqanngitsunut sinniisoq
- Inuit pisinnaatitaaffiinut allanut sinniisoq
Ilaatigut nunatsinni inuiaqatigiinni, inuttut pisinnaatitaaffinnut tunngatillugu unammilligassat oqaluuserinerisigut, nunatsinni inuit pisinnaatitaaffiinik siuarsaanissaq illersuinissarlu, IPS-ip suliassaraa. Pingaartumik inuit pisinnaatitaaffiinut tunngatillugu innuttaasunut nalinginnaasunut, pisortanut suliniaqatigiiffinnullu pisortanut attuumassuteqanngitsunut, kiisalu Naalakkersuisunut Inatsisartunullu qaammarsaanikkut siunnersuinikkullu, IPS taamaaliortarpoq
Danmarkimi Inuit Pisinnaatitaaffii pillugit Institutti (IMR), politikkikkut qinnutigineqarneragut, 2014-imiilli pisortatigoortumik nunatsinnut inuit pisinnaatitaaffii pillugit suliniaqatigiiffiusoq (NHRI), IPS -imit qanimut suleqatigineqarpoq. IMR pillugu uani annertunerusunik paasisassarsiorit www.humanrights.dk.