IPS inissitsiterluni ataatsimiinnermi ilaasortanik nutaanik tikilluaqqusipput

Siunnersuisoqatigiit aalajangersimasunik sisamanik - qulinillu Inatsisartut toqqagaannik ilaasortaqarput. Aalajangersimasumik ilaasortaasut tassaapput meeqqat pillugit oqaaseqartartoq, innarluutillit pillugit oqaaseqartartoq, utoqqaat pillugit oqaaseqartartoq Naligiissitaanermullu Siunnersuisoqatigiinni siulittaasoq.

Ilaasortat qulit ukiut sisamakkaarlugit toqqagaasarput, ukiullu allortarlugit innersuussani, tallimat taarserneqartarlutik. Maannalu ilaasortaajunnaartut tassaapput: Katrine Nathanielsen, Arnajaaq Lynge, Sara Olsvig, Gujo Thorsteinsson kiisalu Lise Mørup Dalsgaard.

Taakku taartaat tassaapput: Niels Skifte, Arnanguak Schmidt, Tukumminngiaq Olsen Lyberth, Ulunnguaq Markussen kiisalu Christina Johnsen.

Inissititerluni ataatsimiinnermi Qivioq Løvstrøm siulittaasutut qinigaaqqippoq, Tukumminngiaq Olsen Lyberth-ilu siulittaasup tulliatut qinerneqarluni.

• "Inissitsiterluni ataatsimiinnermi ilaasortanngortut tikilluaqquagut, tunuartullu inuttut pisinnaatitaaffiit pillugit suliniutaannut qutsavigalugit", Qivioq Løvstrøm oqarpoq. "Ukiuni kingullerni marlunni, nunatsinni inuit pisinnaatitaaffiinik siuarsaaqataasunik amerlasuunik, suliaqarpugut."

Ukiuni kingullerni IPS, Danmarkimi Inuit Pisinnaatitaaffiinut Instituti suleqatigalugu, ilaatigut ineqarnissamut pisinnaatitaaffeqarneq, inuit pisinnaatitaaffii pillugit ilinniartitaaneq ilinniartitsinerlu, ammip qalipaataa tunngavigalugu immikkoortitisarnerit atorunnaarsinnissaat pillugu isumaqatigiissut, kiisalu arnanik immikkoortitsisarnerup atorunnaarsinnissaa pillugu nalunaarusiorput. Tamatuma saniatigut arnat pisinnaatitaaffii pillugit isumaqatigiissut atuaruminarsagaq saqqummiunneqarpoq, kinguaassiuutitigut pinngitsaaliisarneq pillugu inatsimmi aalajangersagaq akuerseqqaarnissamik piumasaqaatitalik pillugu paasissutissat, nunatsinni inuinnarnik peqataatitsineq innarluutilinnullu politikki pillugit allakkiaq, eqqagassalerineq pillugu allakkiaq, kiisalu nunatsinni inissatut- ulloq unnuarlu neqeroorutini kinguaassiuutitigut innarliinernut illersuinissaq pillugu allakkiaq.

• "Nunatsinni inuit pisinnaatitaaffiinik nakkutilliinerup saniatigut, Siunnersuisoqatigiit suliaasa ilaat annertuut qaammarsaanermut tunngasuupput. Innuttaasut pisinnaatitaaffitik ilisimanngikkunikkit, eqquutsinneqarnissaat piumasarisinnaanngilaat. Qaammasaanermi suliaq pitsaasoq maannamut ingerlatarput, Atlantikup Avannaamiuinut aningaasaliissutit iluaqutigalugit kivissinnaasimavarput. Taakku 2021-imiit 2024-imut aningaasaliissutaapput, soorunalumi suliniutit tamanut iluaqutaasussat sapinngisamik nanginnissaannut periarfissinneqarnissarput neriuutigaarput," Qivioq Løvstrøm oqarpoq.

Inuit Pisinnaatitaaffii pillugit Siunnersuisoqatigiit:

Siulittaasoq: Qivioq Løvstrøm (inuit pisinnaatitaaffii pillugit soqutigisanut allanut sinniisuusoq)

Siulittaasup tullia: Tukumminngiaq Olsen Lyberth (nunat inoqqaavisa pisinnaatitaaffii pillugit suliniaqatigiiffinnut pisortanut attuumassuteqanngitsunut sinniisoq)

Siunnersuisoqatigiinni ilaasortat:

Arnannguak Schmidt (meeqqanut inuusuttunullu tunngatillugu suliniaqatigiiffinnut pisortanut attuumassuteqanngitsunut sinniisoq)

Christina Johnsen (eqqartuussiveqarnermut inatsisitigullu illersugaanermut sinniisoq)

Niels Skifte (innarluutilinnut tunngatillugu suliniaqatigiiffinnut pisortanut attuumassuteqanngitsunut sinniisoq)

Ulunnguaq Markussen (ilinniartitaanermut ilisimatusarnermullu sinniisoq)

Carl-Christian Puju Olsen (inuit pisinnaatitaaffii pillugit soqutigisanut allanut sinniisoq)

Kaj Kleist (inuit pisinnaatitaaffii pillugit soqutigisanut allanut sinniisoq)

Daniel Thorleifsen (inuit pisinnaatitaaffii pillugit soqutigisanut allanut sinniisoq)

Stinus Silassen (inuit pisinnaatitaaffii pillugit soqutigisanut allanut sinniisoq)