Qanoq suleriaaseqarpugut?
IPS -ip inatsimmi aalajangersakkat naapertorlugit sulinerani ingerlatsinermut aningaasartuutinut matussusiisussanik Aningaasanut Inatsimmi aningaasaliisoqarpoq.nd.
Nunatsinni Inuit Pisinnaatitaaffii pillugit Siunnersuisoqatigiit, nunatsinni inuit pisinnaatitaffii taakkulu qanoq inissisimanerat pillugit siuarsaanissaq qaammarsaanissarlu suliniutigaat.
Ukiumut marloriarluni Siunnersuisoqatigiinni ataatsimiittarnerni, suut immikkut ukkanneqarnissaat aalajangiivigineqartarpoq.
Siunnersuisoqatigiit inuit pisinnaatitaaffiinik suliaqartarput:
- Naalagaaffiit Peqatigiit inuit pisinnaatitaaffii pillugit isumaqatigiissutaannik Inatsisartut akuersinissaannut kajumissaarinikkut
- Isumaqatigiissutinik akuerisaminik nunatta eqquutitsineranik naliliinikkut
- Nunatsinni pissutsit pillugit nalunaarusiornikkut
- Inatsisissani arlaqaqisuni tusarniaavigineqartarnikkut
Tamatuma saniatigut Siunnersuisoqatigiit sulinerminni pingaarutilittut isigaat:
- Innuttaasut pisinnaatitaaffiinik ilisimatinnissaat
- Pisinnaatitaaffiit eqquutsinneqarnerat qulakkeerniarlugu peqatigiiffinnik pioreersunik tapersersuinissaq
- Inuit pisinnaatitaaffiinik nunatsinnit eqquutsinneqanngitsunik ukkassinissaq
- Inuit pisinnaatitaafiinut tunngatillugu pitsannguutissanik innersuussinissaq
IPS -ip inatsimmi aalajangersakkat naapertorlugit sulinerani ingerlatsinermut aningaasartuutinut matussusiisussanik Aningaasanut Inatsimmi aningaasaliisoqarpoq. Taakku saniatigut IPS aningaasaateqarfinnit aningaasaliissutiniillu qinnuteqarsinnaavoq.
2024-ip naanissaata tungaanut ingerlatitseqqiinernut atatillugu suliniutit arlallit, nunatsinni inuit pisinnaatitaaffii pillugit ilisimasatigut siuarsaasussat aningaasaliiffigineqarnissaannik qulakkeerisunik, Atlantikup Avannaamiuinut Aningaasaliissutit ilaannik IPS pissarsisarpoq. Suliniutinik sulialik, allatseqarfinnguami immikkut nukissatut iluarineqaqisoq, aningaasaliissutinit taakkunannga aningaasaliiffigineqarallarportaaq.
Suleqatigisartakkat
Nunatsinni Inuit Pisinnaatitaaffii pillugit Siunnersuisoqatigiit, Danmarkimi Inuit Pisinnaatitaaffii pillugit Institutti (IMR) suleqatigaa nunatsinnilu inuit pisinnaatitaaffiinik sapinngisaq tamaat ukkassinissaq siunertaralugu Naalakkersuisunik, kommuninik, pisortat suliffeqarfiutaannik inuinnaallu suliniaqatigiiffiinik allanik, suleqateqarlutik. MIO, Tilioq, Naligiissitaanermut Siunnersuisoqatigiit utoqqaallu illersuisuata Siunnersuisoqatigiinni ilaasortaanerisigut, suliniaqatigiiffinnik taakkunannga pitsaasumik qanimut suleqateqarneq qulakkeerneqarportaaq.
Tamakku saniatigut Inuit Pisinnaatitaaffii pillugit Siunnersuisoqatigiit, nunatsinni inuit pisinnaatitaaffiinik annertusaaniarlutik ikorfartuiniarlutillu, nunani tamalaani attaveqarfinni arlalinni ilaapputtaaq
Sulineq pisinnaatitaaffinnik tunngaveqartoq, Danmarkip Kalaallit Nunaatalu inuit pisinnaatitaaffii pillugit pisussaaffiinik aallaaveqarpoq.