Oqaatsit pillugit suliniut

Inuit pisinnaatitaaffiinut tunngatillugu sammisani oqaatsinik kalaallisut nassuiaatissaqannginnerup, kalaallisut oqalliseqataanissaq ajornakusuulersissinnaava.

Inuit pisinnaatitaaffiisa taama pingaaruteqartigisut oqallisiginissaannut periarfissaqannginneq, nunatsinni inuit pisinnaatitaaffiinut tunngatillugu imaannaanngitsunik kinguneqarsinnaavoq. Oqaatsinik amigaateqarneq, sammisaq pillugu inuiaqatigiinni oqallitsitsinissat ajornakusoornerannik kinguneqarpoq, innuttaasut kalaallisuinnaq oqaasillit, inuit pisinnaatitaaffii pillugit danskisut oqallinnernit peqataatinneqanngitsoorsinnaapput.

Ajornerpaaffiani inuit pisinnaatitaffii pillugit ilisimasaqalernissamut namminerlu pisinnaatitaaffiit oqallisiginissaannut periarfissaqannginneq, pisinnaatitaaffiit taakku piumasarineqarsinnaannginnerannik allannguinissamullu periarfissaqarani innarlerneqarsinnaanerannik isumaqarpoq.

Taamaammat Inuit Pisinnaatitaaffii pillugit Siunnersuisoqatigiit, Oqaasileriffik suleqatigalugu, inuit pisinnaatitaaffii pillugit taaguutinut nalunaarsuiffiliussaaq.