Nunarput akimorlugu festivalini inuit pisinnaatitaaffiinik nersorinninneq
Inuit Pisinnaatitaaffii pillugit Siunnersuisoqatigiit (IPS) Inuillu Pisinnaatitaaffiinut Institut, ’TAMAT festivaliat – Illit inuunerit, illit pisinnaatitaaffitit’ qulequtsiullugu innuttaasunik katerisitsissapput. Qitinneq, filmimik piviusulersaarummik isiginnaarneq, erinarsorneq ammasumillu oqaloqatigiinnerit pisussanut ilaapput.
”Inuttut pisinnaatitaaffeqarnerit ilisimaviuk? ” Erinarsuut ’Pisinnaatitaaffiit’, ullumikkut saqqummiunneqartoq taama aallarniuteqarpoq. Erinarsuummik, IPS-imit Inuillu Pisinnaatitaaffiinut Institutimit suleqatigiissutaasumik erinarsuusiortuuvoq Angajo Lennert-Sandgreen (Hinnarik). Inuit pisinnaatitaaffii pillugit sullissiviit taakku marluk, innuttaasut nunatsinni inuit pisinnaatitaaffiinik soqutiginninnerat ilisimanninnerallu nukittorsarniarlugit assigiinngitsunik periuseqarlutik sulipput.
’Pisinnaatitaaffiit’ festivalinut- IPS-imit Institutimiillu; kommunit, ilinniarfiit, suliffeqarfiit najukkanilu nukiit allat nunatsinni kommunini tamani, illoqarfinni toqqakkani tallimaniittut suleqatigalugit ingerlanneqartunut arlalinnut- aallarniutitut saqqummiunneqarpoq.
Ruth Montgomery-Andersen, NuQi – Nunatta Qiteqatigiittarfiat aqutsisoq, qitinnermik ilinniartitsisuni suleqatigalugit, pisinnaatitaaffiit pillugit erinarsuummut qitimmik qiteriaasiortuuvoq. Erinarsuut qitillu festivalini pingaaruteqarput.
Festivalernerni, NuQi-miit qitinnermik sungiusaasumiit qitik pillugu suleqatigiissuteqartitsissaaq (workshops), tassani meeqqerivinniittut - atuartullu, utoqqaat illuanni najugallit innuttaasullu soqutiginnittut allat tamarmik, inuit pisinnaatitaaffii pillugit iliuuseqassapput.
”Inuit pisinnaatitaaffiisa tamatsinnut atuunnerisa qanorlu inuunitsinnut ulluinnatsinnullu isumaqarnerisa ilisimaarinissaa, nunatta siunissaanut pingaaruteqarpoq. Festivalit; nipilersorneq, qitinneq, filmi oqaloqatigiinnerlu atorlugit inunnik katerisitsisut, inuit pisinnaatitaaffiinik soqutiginnilersitsinissamut sakkussatut nukittuujunerat upperaarput,”
Nunatsinniittut tamarmik erinarsuummik ilikkarnissaat qitikkusulernissaallu anguniagaammat, erinarsuut qitillu nittartakkani aallerfiusartuni nittartakkanilu allani arlalinni tusarnaarneqarsinnaallutillu takuneqarsinnaallutillu misigineqarsinnaassapput.
Filmi Robert-innassutaasinnaasutut innersuussaq ammasumillu oqaloqatigiinnerit
Festivalernerni filmi piviusulersaarut ’Twice Colonized’, inatsisilerituumik inuillu pisinnaatitaaffii pillugit suliniuteqartumik Aaju Peter-mik ilisarititsisoq aamma takutinneqassaaq. Aajup nunat issittut akimorlugit inuit pisinnaatitaaffiinik nukittorsaanissamut inuunini atorpaa. Filmi takutinneqareerpat, IPS-ip Institutillu, nunap inoqqaavisa pisinnaatitaaffii pillugit ammasumik oqaloqatigiissitsineranni, festivalertut nunap inoqqaavisa pisinnatitaaffii Kalaallit Nunaatalu Danmarkillu ataqatigiinnerat pillugit paasisaqarnerusinnaassapput.
Festivalernerit nalaanni suleqatigiissuteqartitsinerni (workshops) IPS-imit ingerlanneqartussani meeqqerivinni meeqqallu atuarfiini inuit pisinnaatitaaffii pillugit ammasumik oqaloqatigiissitsinissat anguniagaapputtaaq.
Ilinniarnertuunngorniarfinni kommuninilu sulisunik suleqatigiissuteqartitsinerni (workshops), IPS inuit pisinnaatitaaffii pillugit apeqqutit oqaloqatigiissutissat iluaqutsiullugit, 2023-ip ingerlanerani nunatsinni sumiiffinni arlalinni pisinnaatitaffiit pillugit oqaloqatigiinnerit ullutsinni pisut napertuuttullu ingerlanneqareerput. Uani annertunerusunik paasisassarsiorit: Læs mere her.
Festivali siulleq Maniitsumi ingerlanneqassaaq
Qeqqata Kommunia februaarip ulluisa 21-ianniit 25-iannut Maniitsumi ingerlanneqartumik festivaalerfioqqaassaaq.
”Inuit pisinnaatitaaffiisa innuttaasunit ilisimaneqarnerat, kommunitsinni atugarissaarnermut annertuumik pingaaruteqarpoq. ilisimasaqarneruneq ass. peqqissuunissamut pisinnaatitaaffeqarnermut immikkoortitaannginnissamullu sorsuutiginninnissamut pinngitssorneqarsinnaanngitsunik sakkussiissaaq,”
