Kalaallit Nunaata Danmarkillu naliliivigineqarnerat: Naalagaaffiit Peqatigiit naalliutsitsisarneq pillugu ataatsimiititaliaata spiralilersuisimaneq ernumanartutut oqaatigaa
Kalaallit niviarsiarartaannik arnartaannillu 1960-ip kingorna spiralilersuisimaneq, Naalagaaffiit Peqqatigiit naalliutsitsisarneq pillugu ataatsimiititaliaani ernumanartinneqarpoq. Akuersisitseqqaarani spiralilersuisimanerit tamarmik, 1991-ip kingorna pisut ilanngullugit, akisussaatitsinissaq innarligaasullu utoqqatserfigineqarnissaat siunertaralugit, iterngi tikillugit misissuiffigineqarnissaat ataatsimiititaliamit innersuussutaavoq.
Kunngeqarfiup Danmarkip naalliutsitsisarneq allatigullu inuttut naleqassutsimik innarliineq akiorniarlugit suliniutai, Naalagaaffiit Peqatigiit naalliutsitsisarneq pillugu ataatsimiititaliaata, novembarip ulluisa arfineq pingajuanniit qulingiluaannut naliliivigai. Naalliutsitsisarneq pillugu isumaqatigiissut eqquutsinniarlugu iliuuseqarfigisariallit pingaarutillit arlallit, ataatsimiititaliap nalunaarusiamini tikkuarpai.
Taakku ilagaat spiralilersuisimaneq, tassalu 1960-iimiit danskit nakorsat akuersisitseqqaaratik niviarsiaqqanik arnanillu spiralilersuisimanerat.
Kunngeqarfiup Danmarkip, tamatumunngalu atatillugu nunatta, naalliutsitsisarneq pillugu isumaqatigiissut eqquutsinniarlugu suliniutaannik Naalagaaffiit Peqatigiit misissuinerat, Inuit Pisinnaatitaffii pillugit Siunnersuisoqatigiit siulittaasuata Qivioq Løvstrømip nuannaarutigaa. Siunnersuisoqatigiit, ICC meeqqallu pillugit suliniaqatigiiffik MIO peqatigalugit spiralilersuisimaneq pillugu arlaannaannulluunniit attuumassuteqanngitsumik, 1991-ip kingorna Peqqinnissaqarfiup nunatsinnit tiguneqarnerata kingorna pisut ilanngullugit misissuinerup annertusineqarnissaanik kaammattuipput.
"Naalagaaffik imal. pisortaqarfik, inuit pisinnaatitaaffiinik innarliisinnaasumik iliuuseqarpat, suliat tamarmik iterngi tikillugit misissorneqassapput – Peqqinnissaqarfiup 1991-imi nunatsinnit tiguneqareernerata kingorna, akuersisitseqqaarani spiralilersuisoqarsimaneranik pasitsaassisoqarpat, taakku soorunami aamma misissuiffigineqassapput. Akuersisitseqqaarani spiralilersuineq, iliuuseqarnerup qanga pisimanera apeqqutaatinnagu, niviarsiaqqat arnallu nammineq aalajangersinnaanermut pisinnaatitaaffiannik innarliineruvoq annertooq.”
Isornartorsiorneqartut allat
Naalagaaffiit Peqatigiit naalliutsitsisarneq pillugu ataatsimiititaliaata Kunngeqarfimmi Danmarkimi unammilligassanut allanut arlalinnut; pinerluttunik isumaginnittoqarfimmi, politiini tarnimikkullu nappaatilinnik sullissinermi unammilligassanut tunngassutillit maluginiarpaattaaq.
”Naalagaaffiit Peqatigiit naalliutsitsisarneq pillugu ataatsimiititaliaata isornartorsiuinerata nunatsinnit akuerineqarnissaa, ataatsimiititaliallu innersuussutaasa sapinngisamik piaarnerpaamik iliuuseqarfiginissaat neriuutigaarput naatsorsuutigalugulu.”
Naalagaaffiit Peqatigiit naalliutsitsisarneq pillugu ataatsimiititaliaata nalunaarusiaa ilanngunneqarpoq.
Annertunerusunik paasisaqarusuttut Qivioq Løvstrøm: Qivioq@humanrights.gl imal. allatseqarfik: info@humanrights.gl attavigisinnaavaat.