Maaji qammat 2023 Tilioq ataatsimeersuarmat pingaarnersiukkat

Ullup ingerlanerani pissanganartunik arlalinnik saqqummiussisoqarpoq, amerlasuunillu pitsaasunik naapertuuttunillu oqariartuuteqarluni. Assersuutigalugu Niels Maniitsumeersoq, tassanngaannaq piginnaassutsikkut annertuumik kingunilimmik qaratsamigut ajoqusernini pillugu nammineq inuttut misigisaminik aviteqateqartoq. Nielsip pisortaqarfinnik naapitsinini ikiorneqarnissamullu qanoq sorsussimanini sulilu sorsunnini nassuiarpaa.

Pierre Essoh-ip Nunavummi Disabilities Makinnasuaqtiit Society-meersup (NDMS), innuttaasut innarluuteqartut inuiaqatigiinni tamakkiisumik akuutinneqarnissaannik periarfissinneqarnissaannillu qulakkeeriniarlutik namminneq ukkassatik suliatillu nassuiarpai. Taakku ilaatigut suliffeqarfinnut attaveqarnissaq qulakkeerpaat, suliffeqarsinnaanissarlu siunertaralugu piginnaasanik inerisaanermik ikorfartuillutik. Taakku suliniaqatigiiffianit, ataatsimik saaffiginnittarfeqarnertut ittoq, inunnut innarluutilinnut neqeroorutaavoq. Taamaalillini inuk pisortaqarfinnik naapitsinermini kisimeeqqunagu.

Ingrid Thunemip, Norgimi Tromsø-meersup PBA (inuttut nammineq aqutamik ikiortissarsinissamut aaqqissuussineq)oqaluttuaraa. Inuk innarluutilik nammineq ikorfartortissaminik, sapinngisamik nammineerluni inuusinnaanissamut ikiuuttussanik, atorfinitsitsissaaq. Innuttaasup nammineq kommunip neqeroorutai skemalersukkat maleruuffiginagit imal. killilerneqarani sammisassani pilersaarusiorlugillu aqussinnaavai. Taamaalilluni Ingrid PhD-nngorsinnaasimavoq, peqatigiiffimmut siulittaasunngorluni suliffeqarlunilu.

Ataatsimik saaffiginnittarfeqarnissamik tunngaveqarneq

Ataatsimik saaffiginnitarfeqarnissamik eqqarsaat, inuit innarluutillit aamma/imal. timikkut piginnaanikillisimasut, allaffissornikkut ingerlatsvimmik, suliffeqarfimmik sunngiffimmilu neqeroorutinik naapitsinerminni ikiorneqarsinnaanerat tapersersorneqarsinnaanerallu, immikkut isumassarsinarpoq.

Innuttaasut tamarmik assigiinnik pisinnaatitaffeqaraluit, kommunini assigiinngitsorujussuarnik neqeroorfigineqarlutillu periarfissinneqartarmata, innuttaasut sanngiiffeqartut eqqortumik ikiorneqarsinnaanissaannik aqqutsissiuunneqarsinnaanissaannillu qulakkeerisumik, qitiusumik immikkoortoqarnissaq, nunatsinni pissusissamisoorsinnaavoq. Pisortaqarfimmik naapitsinerup qanoq nungullarnartiginera, innuttaasunit tusartuarparput, amerlasuullu nukissaarullutik, pitsaanerusumik tapersersorneqarnissamut periarfissaqarsinnaanissartik neriuutigalugu, Danmarkimut nuuttarput.

Akuutitsineq innuttaasumut inuiaqatigiinnullu iluaqutaavoq

Inuit innarluutillit inuiaqatigiinnut tunniussaqarsinnaapput tunniusserusukkajullutillu, soorlu inuit tamarmik ataatsimoortunut peqataanissaq pisariaqartikkaat. Suliffeqarfiit inuullu innarluutillip akornanni attaveqarnikkut ingerlatitseqqiinikkullu immaqa imminnut anngusinnaanissaat ajornannginnerussaaq, isummallu pigiliutiinnakkat nungutinneqarsinnaallutik.

Ass. inunnut innarluutilinnut sungiusarnermut inuillu akornanni sammisanut tunngatillugu, nunatsinni qarasaasiakkut periarfissanik pitsaanerujussuarmik atuisinnaavugut. Najukkami inuttut innarluuteqartutuaagaanni kiserliornalaarsinnaavoq.

Inatsisit pisortaqarfiillu

Inatsisit periusissiallu, innuttaasumut pisinnaatitaaffimminik paasiniaasussamut, sulianillu ingerlatsisumut, innuttasup eqqortumik ikiorneqarnissaanik qulakkeerisussamut paasilertoruminartuunissaat iliuuseqarfigineqarsinnaanissaallu pingaaruteqarpoq. Taamaammat tamatta periusissiatsinnik, inatsisitsinnik innuttaasut innarluutillit pisinnaatitaaffiinik pisariaqartitaannillu eqquutsitsinissamut periutsitsinnik naliliinissarput pisariaqarpoq. Pisortaqarfiunngitsoq innuttaaasorli- inuk aallaaviusariaqarpoq.

#taasinerittitusindtit

Tilioq Facebookkimi quppernermik pilersitsivoq atsikkaminik #taasinerittitusindtit #enmilionstemmer-ip taamaaqataa; suliniaqatigiiffik inuit innarluutillit tarnikkullu sanngiiffeqartut qanigisaasullu inatsisitigut illersugaanissaannik sorsuutiginnittoq. #taasinerittitusindtit inuttut innarluuteqarnermut tunngasunik ukkassilersitseqataassaaq, inunnullu innarluutilinnut taakkulu ulluinnaannut tunngatillugu pisinnaatitaaffinnik, minnerunngitsumillu ataatsimoornermik malugineqarnissamillu pilersitsissalluni. Siunnersuisoqatigiit, Facebookimi ilaasortanngornissamut periarfissallu tamatuma attavigisanut avitseqatigiissutiginissaanik kaammattorneqarput.

www.tilioq.gl-imi annertunerusunik paasisassarsiorit.

Tilioq, saqqummiisut minnerunngitsumillu peqatigiiffik Orpigaq ullormut isumassarsiviulluartumut qutsavigaagut.